Чойбалсан, Дорнод
ИТХЗДТГТөлөөлөлТөрийн мэдээНамуудУлстөрч
 
 

Газрын тосны тусгай зөвшөөрлийн төлбөрийн 30 хувийг орон нутагт хуваарилах хууль хэрэгжихгүй байна

2020-02-04 15:37

“Алтыг нь аваад авдрыг нь “ гэж үг бий.  Уул уурхайгаас олж буй орлогыг улсын төсөвт бүгдийг төвлөрүүлж байгаагаас уг уурхайг газар нутаг дээрээ ажиллуулж, сөрөг нөлөөллийг нь амь, амжиргаагаараа эдэлж буй нутгийн хүмүүст төдий л хүртээл алга.

Газрын тос олборлолтоос болж  бэлчээрээ сүйтгүүлж, цэвэр усны хомсдол, цөлжилт, хуурайшилт, тоосжилтод өртөж буй Дорнод аймгийн Матад, Халхгол сумынхан гэхэд тусгай зөвшөөрлийн төлбөрийнхөө 30 хувийг орон нутагтаа авах хуулиар олгогдсон эрхээ эдэлж чадахгүй олон жилийн нүүр үзэж байна.

Дорнод аймгийн Матад, Халх гол сумын нутагт БНХАУ-ын “Петрочайна дачин тамсаг ” компани 2005 оноос эхлэн газрын тос олборлон экспортолж буй. Тус компани  Бүтээгдэхүүн хуваах гэрээт 19-р талбайд 210 км квадрат, 21-р талбайд 650 км квадрат талбайд газрын тос олборлодог.  Газрын тосны тухай хуулинд “Ашиглалтын тусгай зөвшөөрлийн жилийн төлбөр нь нэг хавтгай дөрвөлжин км тутамд 100 ам доллартай тэнцэх хэмжээний төгрөг байна” гэж заасны дагуу 2015-2017 оны улсын төсөвт тусгай зөвшөөрлийн төлбөр болгож, нийт 929,6 сая төгрөг төвлөрүүлсэн байна. Гэтэл уг төлбөрөөс хуулиараа орон нутагт очих хувийг өнөөдрийг болтол хуваарилаагүй, нэгдсэн төсөвт захиран зарцуулсаар иржээ.

Уг нь газрын тосны тухай хуулийн 30,6-д “Тусгай зөвшөөрлийн төлбөрийн 10 хувийг тухайн тусгай зөвшөөрлийн талбайг харьяалах сум, дүүргийн төсөвт, 20 хувийг аймаг, нийслэлийн төсөвт, 70 хувийг улсын төсөвт тус тус хуваарилна” гэж заасан байдаг.

 

Энэ хуулиар бол зөвхөн газрын тосны 21-р талбайгаас л гэхэд байгалийн нөөц ашигласны төлбөрт жил бүр 40 тэрбум төгрөг улсын төсөвт төвлөрдөг бөгөөд  Дорнод аймгийн орон нутгийн хөгжлийн санд 40 тэрбумын 30 хувь буюу 12 тэрбум төгрөг хуваарилдагдах ёстой ч өнөөдрийг хүртэл авч чадахгүй байгаа ажээ.

Иймд Төсвийн тухай хууль, газрын тосны тухай хуулийн дагуу Дорнод аймаг , Халхгол, Матад сумын  2018 оны төсөвт тусгай зөвшөөрлийн төлбөрт ноогдох орлогуудыг хуваарилж, 2015-2017 оны төлбөрийг нөхөн олгох хүсэлтийг Дорнод аймгийн Засаг дарга М.Бадамсүрэн холбогдох газруудад  тавьжээ.

http://record.mn/?p=850&fbclid=IwAR1gWws_v7h9iXS8eykuU_SS8wHQbh1kaXeUrESdnwpI-Sy4FO4kcTUCw0o



Сэтгэгдэлүүд
АНХААРУУЛГА:Уншигчдын бичсэн сэтгэгдэлд манай сайт хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Утас: 88143066, 96556965

Нэр:  
Сэтгэгдэл:  
 
Шинэ мэдээ
Их уншигдсан
Facebook page
 
 
Урлаг Спорт
Хөдөлмөр, халамжийн үйлчилгээний газар